Gjermania arriti të kualifikohet për në finalen e Europianit të 21-vjeçarëve, teksa mposhti në gjysmëfinale Holandën me rezultatin 2-1.
Paraqitje të shkëlqyer për “Pancerat” tregoi edhe futbollisti me origjinë shqiptare, Mërgim Berisha. Ky i fundit ishte me të vërtetë i pafat mbrëmjen e djeshme, teksa pa që gjuajtjet e tij të ndaleshin 3 herë në shtyllë dhe tranversë. Lojtari nuk arrinte t’i besonte syve për atë që po ndodhte, pro u ngushëllua me kualifikimin në finale.
Kujtojmë se ekipi i drejtuar nga ish-futbollisti i njohur gjerman, Stefan Kuntz, ka mundur 2-1 Holandën dhe ka arritur të shkojë në finalen e Kampionatit Europian të 21-vjeçarëve për të tretin edicion radhazi dhe kanë barazuar rekordin që mbahej nga Italia me praninë radhazi në vitet 1992, 1994 dhe 1996.
Gjermania nisi këtë seri finalesh me një fitore në vitin 2017 ndaj Spanjës, duke u shpallur Kampione Europe, ndërsa u mund nga spanjollët dy vite më vonë. Tani, në finale përballë saj nuk do të jetë më Spanja, pasi ajo u mund nga Portugalia më rezultatin 1-0 dhe gjermanët do të mundohen të kthehen në fron në duelin e të dielës përballë luzitanëve. Mërgim Berisha do të diskutojë trofeun e madh ndaj moshtarëve të Portugalisë më 6 qershor në Ljubjanë të Sllovenisë.
