Kandidati i pavarur në Gjirokastër në zgjedhjet e 25 Prillit, i mbështetur nga “Vetëvendosje”, ka depozituar ankim në Kolegjin Zgjedhor, duke kërkuar pavlefshmërinë e zgjedhjeve në Gjirokastër.
“Dje, ditën e hënë më 24 maj 2021, Kreshnik Merxhani në cilësinë kandidatit nga zgjedhësit në Qarkun e Gjirokastrës në zgjedhjet e 25 prillit, dorëzoi në Kolegjin Zgjedhor Gjyqësor padinë për të kundërshtuar vendimin e KAS. Ky vendim rrëzonte ankesën tonë mbështetur mbi faktet e parregullsive dhe manipulimit të procesit zgjedhor si dhe një sërë veprash penale të konstatuara, për pavlefshmërinë e zgjedhjeve në këtë qark dhe përsëritjen e tyre”, njoftoi “Vetëvendosje”.
“Seanca në Kolegjin Zgjedhor për padinë e Kreshnik Merxhanit do të mbahet ditën e hënë, më 31 maj 2021, ora 10:00. Përpjekjet tona për të bërë publik dhe denoncuar çdo krim elektoral nuk do të ndalen dhe së bashku me to edhe kërkesa për ndëshkimin e fajtorëve dhe vendosjen e drejtësisë”, njofton më tej “Vetëvendosje”.
Më herët, KAS rrëzoi ankimin e Merxhanit për të shpallur pavlefshmërinë e zgjedhjeve në Gjirokastër.
