India shënon një tjetër rekord tragjik nga pandemia e COVID-19, që po e shndërron tashmë vendin, pas uljes së rasteve në Europë dhe SHBA, në epiqendrën e vëmendjes së epidemiologëve botërorë.
Vendi ka regjistruar 4329 viktima në 24 orët e fundit, që çojnë në më shumë se 283 mijë totalin. Ndërkohë, është ulur numri i të infektuarve, edhe pse po flasim për shifra që nuk janë regjistruar në një ditë në asnjë vend tjetër.
Sot të prekurit nga pandemia ishin gjithsesi 263 mijë, dhe autoritetet deklarojnë se shifrat reale mund të jenë më të mëdha, në një vend tejet të madh dhe të populluar, ku shtresat sociale më të ulëta rrallë herë deklarojnë problemet e tyre në institucione, dhe bazohen më së shumti te mjekësia tradicionale.
Ndërkohë, vendi me numrin më të madh të viktimave në botë, Shtetet e Bashkuara, edhe pse regjistrojnë përmirësime të ndjeshme që i kanë lejuar vendit një rikthim pothuajse në normalitet, sot kanë kaluar pragun e 600 mijë viktimave.
