Kryetari i PD-së, Lulzim Basha, zhvilloi sot takimin e parë, pas zgjedhjeve parlamentare të 25 prillit, me 153 kandidatët për deputet, 59 prej të cilëve kanë arritur të marrin mandatet e deputetëve.
Nga raportimet mësohet se Basha, pasi i ka falenderuar kandidatët për fushatën dhe angazhimin e tyre, i ka bërë të njohur edhe skenarët sesi do të vijojnë më tej.
Kryedemokrati ka deklaruar se fillimisht do të përfundojnë procesin e mbledhjes së provave për të faktuar sipas tij masakrën zgjedhore dhe më pas do të flasin me forumet për hapat e ardhshëm, duke nënkuptuar këtu hyrjen në parlament apo edhe çështjen e kryetarit.
“Ne duhet të përfundojmë gjithë procesin e mbledhjeve te fakteve për masakrën elektorale në lidhje me zgjedhjet dhe pastaj do të flasim me forumet përkatëse për hapat e ardhshëm,” ka thënë Basha.
Gjithashtu, Basha ka paralajmëruar nisjen e një turi takimesh me qytetarët në të gjithë vendin, sikundër ka kërkuar nga ekipi i kandidatëve për deputet, përfshi edhe ata që kanë marrë mandatin, që të vijojnë takimet me qytetarët.
