Partizani ka arritur një fitore të madhe 4-0 përballë Kukësit. Në ndeshjen e zhvilluar në stadiumin “Air Albania” të kuqtë u shfaqën dominues në pjesën më të madhe të takimit.
Ekipi i drejtuar nga Ilir Daja, fillimisht gjeti rrugën e rrjetës në minutën e 41-të me anë të Jasir Asanit. Supergol i anësorit, i cili lëshon një gjuajtje të bukur në formë krosimi nga e djathta, me topin që ndalet në fundin e rrjetës.
Dyfishimi i shifrave erdhi vetëm 2 minuta më vonë me autor të golit Cinarin. Pas një topi të marrë nga Hakaj, sulmuesi gjuan bukur dhe e ndal topin në fundin e rrjetës.
Ndërkohë në pjesën e dytë Partizani gjeti rrugën e rrjetës edhe 2 herë të tjera. Stenio Junior trefishoi shifrat në minutën e 67-të pas një gafe në mbrojtjen e verilindorëve ndërkohë Mala i vuri “kapak: sfidës me golin e tij në minutën e 87-të.
“Demat” përfitojnë kështu nga humbja e Teutës kundër Tiranës për tu ngjitur në vendin e dytë por me pikë të barabarta me Vllazninë të cilët mbajnë vendin e parë.
