Kryeministri Edi Rama deklaroi se kishte diskutuar kohë më parë, me homologun slloven Janez Jansha për një plan që projektonte ndryshimin e kufijve në Ballkanin Perëndimor.
Por Kryministri slloven në një reagim në rrjetet sociale ka rrëzuar pretendimet dhe deklaratat e Ramës, duke u shprehur se kurrë nuk ka diskutuar mbi një çështje të tillë me asnjë prej homologëve.
“Ne nuk kemi projektuar ose diskutuar ndonjë hartë të Bosnjës së ndarë apo diçka tjetër me kryeministrin shqiptar apo ndonjë tjetër. Hera e fundit që kam parë një hartë të Bosnjës dhe Hercegovinës së shkatërruar nga lufta, ishte në maj 1993 në një vizitë në Pentagon, kur po kërkonim zgjidhje për të ndaluar konfliktin e armatosur”, thekson Jansha në një postim në rrjet.
Plani i cili i është faturuar tashmë Sllovenisë, flet për bashkimin e Kosovës me Shqipërinë, por me kushtin që Republika Srbska e Bosnje Hercegovinës, ti kalojë Serbisë.
Presidenti i Serbisë Aleksandër Vuçiç ka theksuar se nuk ka dijeni për ekzistencën e një plani të tillë ndërkohë që edhe kryeministri kroat Andrej Plenkoviç, mohoi të kishte dijeni për të.
Dokumenti që konkretizon nevojën se përse duhet të ndodhë rikonfigurimi i kufijve, strategjia dhe hapat drejt këtij qëllimi, zyrtarisht është ende pa autorë.
Radio DW raportonte se “Zgjidhje” titullohet paragrafi i një “non-paper” që kryeministri slloven Janez Janša u dorëzoi disa personave të përzgjedhur në BE disa muaj më parë. Ajo që vijon më tej duket sikur po lexon ndonjë dokument nga Kongresi i Berlinit i vitit 1878, kur Otto von Bismarck, Lord Salisbury dhe Princ Gorçakovi u ulën së bashku përpara hartës së Ballkanit – dhe brenda një muaji vendosën me dorë të lirë për fatin e kombeve.
Sipas radios gjermane, për pikën “a) Bashkimi i Kosovës dhe i Shqipërisë” në letër shkruhen katër rreshta. Për pikën “b) Bashkimi i pjesës më të madhe të Republikës Srpska me Serbinë” vetëm tre. Janša dëshiron të rishikojë edhe konturet e Kroacisë fqinje: “c) Çështja kombëtare Kroate mund të zgjidhet” ose, “duke bashkuar kantonet kryesisht kroate në Bosnjë-Hercegovinë me Kroacinë” ose duke i dhënë “Pjesës kroate” të vendit një “status të veçantë” – “bazuar në modelin e Tirolit të Jugut”.
Po boshnjakët?
Ata që mbeten janë boshnjakët, që përbëjnë gjysmën e popullsisë së vendit. Sipas planit të Janša atyre mund t’u jepet “një shtet që funksionon në mënyrë të pavarur” dhe “për të cilin ata duhet të marrin përgjegjësinë e plotë”. Nëse boshnjakët nuk dëshirojnë, atëhere nuk kanë pse të hyjnë në Evropë: “Ata mund të votojnë në një referendum për një të ardhme në BE ose jo në BE apo Turqi.” Boshnjakët muslimanë janë “përkohësisht” në favor të anëtarësimit në BE . “Por nëse kaosi vazhdon dhe me rritjen e ndikimit të Turqisë dhe islamizmit radikal,” thotë Janša, “situata mund të përkeqësohet në dekadën e ardhshme në mënyrë drastike “.
