Kreu demokrat Lulzim Basha u shpreh gjatë një takimi elektoral në Bulqizë se statusin e minatorit do e miratojë brenda 6 muajve të parë të Qeverisë së drejtuar prej tij.
Basha tha se nëse nuk do të mbante premtimin, atëherë qytetarët do të kishin të drejtë absolute që të vendosnin traun.
“Atë traun në rrugën e Kombit që do e heq që ditën e parë si Kryeministër, vendoseni ju këtu, nëse unë nuk do të mbaj zotimet e mia”, iu tha Basha të pranishmëve, ndërsa i ftoi që bashkë me familjet e tyre dhe çdo qytetar tjetër t´i bashkohen ndryshimit të madh më 25 prill.
Kreu demokrat u shpreh se ai që nuk i mbajti premtimet 8 vite me rradhë, që i la minatorët në galeritë nëntokë pa përkrahje dhe pa mbështetje, jo 4 vite të tjera por edhe 40 vjet të jetë në qeverisje, nuk do të ndryshojë.
“Bashkohuni për ndryshimin e madh, mos ia hapni derën mashtruesit që ju gënjeu për 8 vite”, tha Basha.
