Procesi i dëmshpërblimit nga tërmeti ka qenë i padrejtë dhe shumë familje kanë marrë pak ose aspak.
Xhaferr Zela është një nga kryefamiljarët, që tregon lënien në mëshirë të fatit pas një shpërblimi që nuk mbulon asgjë.
Ai i tha kandidatit për deputet, Belind Këlliçi, se mori vetëm 600 mijë lekë për banesën e dëmtuar. Katër kurorë jetojnë në këtë banesë në periferi të Tiranës, në Vishnje, me dëmtime të rënda strukturore jashtë dhe brenda saj.
Përveç hallit të tërmetit, kryefamiljari tregoi edhe pamjaftueshmërinë e pensionit dhe talljen që u bëri qeveria, me gjoja rritjen e pensionit.
“Janë vetëm dy mijë lekë të vjetra në tetë vjet, nuk del për asgjë”– tha Xhaferri, i cili theksoi se mezi po priste ndryshimin.
“Duroni edhe katër javë, duroni deri në 25 prill dhe do ta ndryshojmë bashkë. Të largojmë këta, që t’i hapim rrugë Shqipërisë për të patur një kryeministër normal”– u shpreh Belind Këlliçi.
