Qeveria ka vendosur të akordojë një fond prej 10 milionë lekësh në ndihmë të familjarëve të ushtarakut Xhevahir Jazaj, i cili humbi jetën gjatë një misioni ushtarak në Afganistan.
Në vendimin e këshillit të ministrave thuhet se ky fond do të përballohet nga buxheti i vitit 2021. Për zbatimin e këtij vendimi është ngarkuar Ministria e Mbrojtjes.
“Vendim për kompensimin e veçantë të familjes së ushtarakut, i cili humbi jetën gjatë kryerjes së detyrës në mision ushtarak jashtë vendit.
Në mbështetje të nenit 100 të Kushtetutës, të pikës 2, të nenit 28, të ligjit nr.9210, datë 23.3.2004, “Për statusin e ushtarakut të Forcave të Armatosura të Republikës së Shqipërisë”, të ndryshuar, dhe të ligjit nr.137/2020, “Për buxhetin e vitit 2021”, të ndryshuar, me propozimin e ministrit të Mbrojtjes, Këshilli i Ministrave vendosi:
Kompensimin e veçantë të familjes së ushtarakut, major Xhevair Lefter Jazaj, i cili humbi jetën gjatë kryerjes së detyrës në mision ushtarak jashtë vendit, në masën 10 000 000 (dhjetë milionë) lekë.
Fondi i përcaktuar në pikën 1, të këtij vendimi, të përballohet nga buxheti i vitit 2021, miratuar për Ministrinë e Mbrojtjes, në programin buxhetor “Forca e luftimit”.
Ngarkohet Ministria e Mbrojtjes për zbatimin e këtij vendimi. Ky vendim hyn në fuqi menjëherë dhe botohet në “Fletoren zyrtare”, thuhet në vendim.
50 vjeçari Xhevahir Jazaj, humbi jetën në Janar të këtij viti në Afganistan, në rrethana të paqarta. Jazaj është ushtaraku i dytë shqiptar i cili ka humbur jetën në një mision në Afganistan.
