Licencimi i Vllaznisë për Kupat e Europës është një temë e hasur shumë kohët e fundit. Shkodranët rrezikojnë të mos marrin pjesë për shkak të borxhit të madh. Mirëpo drejtuesit duken se kanë lëvizur për të zgjidhur problemin dhe këtë e tregon Alban Xhaferi.
Në një intervistë të dhënë për ShkodraSport, ai bën me dije se është futur si ndërmjetës për të zgjidhur problemin. Madje thekson se është bërë gati një kontratë që do të lidhet me tatimet. Do të paguhet fillimisht kësti i parë, për të vijuar më të tej me të tjerat.
“Mund t’iu them se deri tani çdo gjë është në rrugë të mbarë. Më shumë detaje nuk mund të jap sepse jemi në proces. Masat janë marrë dhe po presim në lidhje me kontratën e tatimet. Shuma financiare është gati.
Unë jam optimist sepse po punojmë çdo sekond dhe përkundrazi nuk do kishim punuar për këtë. Por, kjo nuk është vetëm në dorën tonë apo të bashkisë sepse është dhe pala e tatimeve e përfshirë.
Mund të cilësoj se unë si sponsor po ndihmoj klubin me një kontratë borxhi për të shlyer këstin e parë në mënyrë që të lidhet marrëveshja“, ka deklaruar Xhaferi.
