Nga Boldnews.al
“Zëri i Amerikës”, një medium ndërkombëtar i financuar nga qeveria amerikane, konstatoi se shumica dërrmuese e qytetarëve shqiptarë nuk kanë besim tek Prokuroria Speciale, SPAK, duke iu referuar rezultateve të “Barometrit të Sigurisë”, një sondazh i realizuar nga një organizatë jo-qeveritare në Tiranë.
Lajmi ishte korrekt dhe përcillte të dhënat e siguruara nga sondazhi i publikuar këtë të Hënë nga “Qendra për Studimin e Demokracisë dhe Qeverisjes”.
Por ajo që konsiderohet me interes në këtë zhvillim është fakti se “Zëri i Amerikës” vendosi të publikojë një kronikë, e cila zbulon pasivitetin e SPAK-ut, një realitet që njihet më së miri nga qytetarët shqiptarë.
Ky qëndrim i “Zërit të Amerikës” shkon në të kundërt të asaj që deklaron përfaqësuesja zyrtare e Uashingtonit në Tiranë, Yuri Kim.
Ambasadorja amerikane nuk ka lënë rast pa shprehur vlerësimet për rezultatet e prokurorëve specialë, edhe në ato rastet kur kryen operacione rutinore.
Yuri Kim u shpreh me superlativa për operacionin që çoi në arrestimin e gjyqtares së Krujës, Enkelejda Hoxha, ndërkohë që institucionet shqiptare kanë arrestuar edhe më herët gjyqtarë e prokurorë për korrupsion.
Pak ditë më parë, diplomatja amerikane u shfaq si zyrë statistikash, kur vendosi një shënim në rrjete sociale: “588 çështje të ndjekura penalisht, 70 milionë euro asete të konfiskuara. U hetuan 748 persona, nga të cilët 288 janë të arrestuar dhe kemi 114 të dënuar deri më tani. Reforma në Drejtësi po jep rezultate”, shkruan Kim pas takimit me drejtuesin e SPAK-ut, Arben Kraja.
Por, pavarësisht këtyre shifrave të prezantuara nga Yuri Kim, të cilat për hir të së vërtetës u përkasin hetimeve dhe gjykimeve të nisura para krijimit të Strukturës së Posaçme Anti-Korrupsion, qytetarët sërish deklarojnë se e kanë humbur besimin tek institucionet e reja të Reformës në Drejtësi.
Dhe, arsyet e zhgënjimit janë të shumta, sidomos për mungesën e hetimeve dhe gjykimeve për zyrtarët e lartë qeveritarë dhe lidhjet e tyre me krimin e organizuar dhe korrupsionin.
SPAK-u, që në ditët e para të tij, ndoqi modelin negativ “Donika Prela”, për të hequr dorë nga hetimi i dosjeve “339” dhe “184”, në të cilat shfaqeshin eksponentë të lartë të maxhorancës, duke vendosur me elementë të krimit të organizuar për blerje e vjedhje votash.
Ky ishte sinjali i parë që SPAK-u do të vijonte të ishte, në mos edhe më keq, se një kopje e shëmtuar e sistemit të vjetër të drejtësisë, të kapur nga politika.
SPAK-u vendosi të arrestonte dy komisionerë të vdekur të zgjedhjeve të Durrësit, ndërkohë nuk e ka hedhur aspak vështrimin nga Vangjush Dako e të tjera persona, që gjenden sërish në listën e kandidatëve për deputet në Durrës e Dibër.
SPAK-u nuk mori as guximin më të vogël për të hetuar zyrtarët e lartë qeveritarë, pas tenderave “sekretë” dhe abuzivë gjatë periudhës së pandemisë.
SPAK-u duket se as nuk ka ndërmend të hapë dosjet e inceneratorëve dhe koncensioneve të tjera, pavarësisht se kallëzimet dhe dokumentat u janë bërë pirg i madh në zyrat e tyre.
Dhe, përsa kohë nuk ka asnjë sinjal që do të hetojë seriozisht korrupsionin dhe krimin e organizuar të lidhur me qeveritarët, SPAK-u nuk do të bindë jo vetëm qytetarët shqiptarë, por as edhe “Zërin e Amerikës”, përkundër deklaratave për suksese imagjinare të Yuri Kim.
