Edmond Koçi, i njohur ndryshe si Mond Çekiçi, 40 vjeç, u ekzekutua mëngjesin e së shtunës, në qytetin e Durrësit, ndërsa policia ende nuk ka një autor të ndalur lidhur me ngjarjen.
Policia ka shoqëruar rreth 30 persona, ndërsa ka sekuestruar 22 gëzhoja të armës së zjarrit, AK-47, e cila u përdor nga autorët në ekzekutimin e 40-vjeçarit.
Nga raportimet mediatike mësohet se Edmond Koçi rezulton i skeduar në kartotekën e Policisë së Shtetit që në fillim të viteve 2000.
Në rrugë operative, është konsideruar si mik i Lul Berishës dhe anëtar i Bandës së Durrësit, ndërsa problemet ligjore i ka pasur më së shumti për armëmbajtje pa leje.
Nga precedenca policore, Koçi ka qenë i dyshuar për ngjarje të ndryshme kriminale dhe bashkëpunëtor i Berishës.
Ndërkohë, të paktën 4 vendime gjykatash e kanë gjetur fajtor për posedim të armëve pa leje dhe mbajtjen e tyre në publik.
Sipas raportimeve, armët që posedoheshin nga Koçi ishin me numër serie të fshirë. Burimet nga Policia thonë se mbaheshin prej tij për mbrojtje apo qëllime të tjera kriminale.
Në fillim të këtij viti Edmond Koçi u dënua po për armëmbajtje pa leje me rreth 3 vite burg, dënim i cili pavarësisht se 40-vjeçari ishte përsëritës u konvertua në shërbim prove, duke e lënë të lirë.
