Mjekët e spitalit të Shkodrës kanë dalë sot në protestë për të kërkuar lirimin e kolegut të tyre, shefit të Kardiologjisë Edi Smajlaj që u arrestua dje me akuzën për shpërdorim detyre.
Ata kanë shprehur ndinjatën e thellë për veprimin ekstrem të prokurorisë së Shkodrës në arrestimin e kardiologut Smajlaj duke thënë se janë privuar liritë e tij themelore.
“Është absurde që një profesionist i ndershëm të trajtohet si një individ me rrezikshmëri të lartë. I bëjmë thirrje prokurorisë që të tërheqë masën ekstreme të sigurisë dhe të lejojë mjekun të rikthehet pranë shërbimit ndaj pacientëve në spital. Në të kundërt protesta do të përshkallëzohet”, kërcënuan mjekët.
Shefi i pavionit të Kardiologjisë në spitalin e Shkodrës është arrestuar dje nga policia për shpërdorim detyre.
Smajlaj akuzohet se hapi kartelë mjekësore pa qenë në shërbim pa asnjë motiv për pedagogun Simon Lufi, që u arrestua dy ditë më parë në Shkodër, pasi merrte ryshfet për nota kaluese.
Sipas policisë, mjeku Edi Smajlaj firmosi shtrimin në spital të pedagogut me pretendimin se ka probleme shëndetësore, me qëllim që të mos dërgohej në qelinë e paraburgimit.
