Presidenti Ilir Meta u përfshi dje në një përplasje me vartësit e Erion Veliajt, të cilin kishin shkuar për të zbatuar një shkresë pa firmë e vulë, ku i kvrkohej drejtuesve të partisë Fryma e Re Demokratike, për të liruar ambientet.
Gjatë ditës së djeshme vëmendja u përqëndrua te Presidenti, ndërsa u anashkalua fakti se Erion Veliaj urdhëron administratën, qoftë civile apo policë bashkiakë që të veprojnë me letra bakalli, pa numra protokolli, pa firma e vula.
E ndërsa debati mbi Presidentin vijon, një ndjekës i Kryeministrit Edi Rama në rrjetet sociale, e akuzon kreun socialist si bashkëfajtor për ngjarjen e djeshme, pasi ishte PS që e bëri President.
“Je një bashkfajtor për ngjarjen e djeshme të Presidentit. Vure në karriken më të lartë të shtetit shqiptar një njeri që se meritonte atë post. Duhet që në zgjedhjet e 25 prillit të kesh në program edhe emrin e presidentit të ardhshëm. Të mos bësh gabimin që bëre me Ilir Metën” i shkruan një qytetar Edi Ramës.
Rama në përgjigjen e tij ndaj qytetarit thotë se Ilir Meta u zgjodh President me votat e veta. “Ai është zgjedhur me votat e tij, ne nuk i kishim votat për të zgjedhur dikë tjeter as nga opozita as nga PS dhe megjithëse e kam thënë 1000 herë, shumë interesant që disa nuk duan as të dëgjojnë, as të kuptojnë”, shkruan Rama.
Paraditen e sotme Edi Rama u shpreh se Presidenti Meta ka çrregullime shëndetësore.
“Një shfaqje klinikisht e rëndë dhe natyrisht kërkon solidaritet njerëzor. Jo më me dikë që është President që ka çrregullime shëndetësore dukshëm të rënda” ka thënë Rama ndër të tjera.
