Kreu demokrat Lulzim Basha deklaroi se Kryeministri Edi Rama synon të mbajë peng vendin duke i shërbyer pesë njerëzve, por kjo nuk do të ndodhë sipas tij, pasi ka përballë një listë kandidatësh që vijnë nga të gjitha fushat.
Basha u pyet nga gazetarët për dorëheqjen e nënkryetarit të FRPD-së, nëse shihet kjo si revoltë e të rinjve që nuk janë futur në lista, por e hodhi poshtë këtë teori duke theksuar se mes kandidatëve të PD ka edhe studentë.
Në lidhje me deklaratën e kreut të qeverisë Edi Rama sa i përket koalicionit PD-LSI, Basha tha se ky i fundit është i vetmi njeri që mban peng drejtësinë. Rama tha se PD do mbajë larg duart nga drejtësia dhe pas 25 Prillit do tunden prangat për ata që përfshihen në korrupsion.
“5 njerëz me në krye Edi Ramën e mbajnë vendin peng. Përballë tij janë të gjithë. Sipërmarrës të mëdhenj e të vegjël, fermerë e biznes i vogël. E gjithë Shqipëria vuan për shkak të kësaj. Sado të jetë përpjekja për t’i hedhur boja të njëjtës përbërje prapëseprapë është vetëm një grusht njerëzisht. Përballë kemi një ndërthurje qytetare, të shërbimit me devotshmëri nga auditoret e universiteteve. Një listë njerëzish për kauza që shkojnë përtej interesave politike.
Të gjitha shtabet e PD në koordinim ne aleancën për ndryshim dhe LSI kanë qëllim vetëm maskimalizimin e votës. Lista jonë përfaqëson ndryshimin dhe nuk ka pjesë që kërkon ndryshimin më shumë se rinia. Kemi edhe studentë në lista, por jo anonim për të mbuluar korrupsionin dhe krimin e organizuar.
Lista është e kufizuar në numër por e pakufizuar është dëshira për të sjellë ndryshimin për qindra qytetarë që na bashkohen çdo ditë. Nuk durohet më, është fjala që dëgjojë çdo ditë. Me këtë listë ne do largojmë Edi Ramën dhe do sjellim jo vetëm rotacion por ndryshimin e vërtetë.
Reforma në Drejtësi ka ngelur në vendnumëro për shkak të frikës së Edi Ramës. Ne do i mbajmë larg duart nga drejtësia. Do vëmë në dispozicion çdo institucion për të luftuar krimin dhe korrupsionin. Është një nga shtyllat e programit tim. Një nga problemet që ne kemi vuajtur është kapja e drejtësisë nga politika. Problemin në drejtësi e shkaktoi politika. Më 25 Prill Reforma në Drejtësi do të çlirohet. Do tunden prangat për ata që do përfshihen në korrupsion”, tha Basha.
