Kreu demokrat Lulzim Basha ka reaguar me optimizëm lidhur me listën e kandidatëve për deputet të miratuar mbrëmjen e së hënës, duke u shpreh se tashmë PD me aleatët nisin marshimin drejt ndryshimit. Basha e cilësoi listën e kandidatëve si ekipin fitues, ndërsa theksoi se nuk do të kërkojë një mandat të dytë nëse nuk realizon premtimet.
Basha tha se do të vendoset një fytyrë për politikën dhe kjo do jetë fytyra jonë, pasi kjo është rruga e vetme për të rikthyer institucionet te shqiptarët.
“Me 25 prill ndryshimi që po vjen ska vetëm fytyrën e kandidatëve, por të të gjithë shqiptarëve që duan ndryshimin”, tha Basha.
Sipas tij, këto 8 vite gjëja më e tmerrshme ka qenë vrasja e shpresës.
Kreu demokrat u shpreh se kriteret që mishërojnë kandidatët e listës fituese janë sfidat e Shqipërisë. Ai pranoi se ka përpara një betejë të vështirë, ndërsa akuzoi Kryeministrin Edi Rama se ngriti një fasadë për Arben Ahmetajn, Damian Gjiknurin, Olta Xhaçkën.
Ai tha se me 25 prill largojmë Edi Ramën dhe fillojmë ndryshimin me një plan pune që do të vihet në zbatim nga ekspertët më të mirë.
“Do jetë një program ndryshimi për Shqipërinë dhe shqiptarët. Nëse nuk i mbaj angazhimet e marra, nuk kërkoj mandat të dytë. Ne do t’ja kthejmë shtetin dhe ekonominë shqiptarëve”, shtoi ai.
Kreu demokrat theksoi se pa largimin e Ramës gjithçka është e pasigurt, duke shtuar se nuk ka të ardhme me të.
“E vetmja gjë që Rama ofron është fasada. Kandidatët e tij janë Çyrbja, Ndraxhi e Rrahja. Pas fasadës së Ramës fshihen hajdutët e parave të shqiptarëve dhe bandat”, tha Basha, duke shtuar se lista e kandidatëve të opozitës është me integritet të lartë.
“Nuk ka reflektim, por pengmarrje totale të shpresës për ndryshim në PS. Ata që nuk duan ndryshimin, duan të vazhdojnë të fitojnë në kurrizin tuaj”, theksoi Basha, duke shtuar se vetëm një grusht njerëzish nuk e duan ndryshimin.
