Nënkryetari i LSI-së, Petrit Vasili, e ka cilësuar Kryeministrin Edi Rama një kryebandit të Rilindjes, llafazan matuf dhe makut.
Reagimi i Vasilit erdhi pas komenteve që Rama bëri mbi listat e kandidatëve të LSI. Ai tha se Rama është krye plaçkitësi i parave dhe i pronës së shqiptarëve, tradhtari i interesave kombëtare të tyre, ai që la në mëshirë të fatit shqiptarët në ditët më të rënda të tërmetit, ai që i la sërish vetëm në ditët tepër të vështira të pandemisë, që kanë vazhduar e vazhdojnë të jenë të tilla, më kritike se më parë.
“Ai që i la shqiptarët jashtë Europës dhe bllokoi në mënyrë armiqësore dhe të qëllimshme, integrimin europian të vendit. Ai që bëri 400 e ca mijë shqiptarë të braktisnin Shqipërinë. Ai që pa iu dridhur syri shiti Shqipërinë dhe Kosovën. Ai që kthehu Shqipërinë në Kolumbinë e Europës. Ai që ngriti OFL-në për të legjitimuar e legalizuar pronat e kriminelëve në mes të ditës e në mes të sheshit. Ai që shkeli e rrënoi reformën në drejtësi. Ai që dhunoi në mënyrë të përditshme Kushtetutën e vendit.
Ai që bëri votime moniste të papara në Europë e në botë. Ai që me dhunën e fadromave të tij mafioze shemb gjakun, djersën, pronën e shqiptarëve në mënyrë të përditshme. Ai që shkuli zemrën historike të Tiranës dhe që e betonoi atë me mafien e betonit. Guxoi të flasë sot për listën e LSI-së, listën e njerëzve të lirë, të ndershëm, kurajozë e të pa lëkundur.
Edhe kush guxoi ta bëjë këtë? Ai që mbushi Parlamentin me kriminelë, të provuar botërisht. Ai që mbushi bashkitë e vendit, edhe kur i bënte zgjedhjet vetëm, me banditë e kriminelë anë e mbanë vendit. Ai që bleu vota, njeriu që blen vota, dishepulli i blerjes së votave, organizatori i blerjes së votave, frymëzuesi dhe paguesi i blerjes së votave, Edi Rama, e provuar botërisht nga Berlini në Uashington, e ku në dosjen 184, zëri i blerësit të votave Edi Rama buçet në telefon e dëgjohet anë e mbanë vendit me të gjithë sejmenët e zagarët e tij kudo që janë”, tha Vasili.
Në vijim nënkryetari i LSI u shpreh se lista e kandidatëve të Edi Ramës është funerali përfundimtar i Partisë Socialiste.
“Kjo listë është lista e horrave të inceneratorëve, që ndajnë e shqyejnë paratë publike, dosjet e të cilëve ndodhen në SPAK, e ku dosje të tjera do të shkojnë atje, për të provuar vjedhjen e shekullit. Gjithashtu është lista e horrave të parave të pista. Është lista e horrave të mafies, që e kthyen Shqipërinë në tërësi, e Tiranën në veçanti, në një lavatriçe të parave të qelbura të krimit e të mafies. Është lista e koncesioneve, klientëve të tyre dhe e klientëve të oligarkëve, të cilët janë të rreshtuar në listë nga i pari, deri tek i fundit.
Është lista e atyre që fshehën vdekjet nga pandemia, që i lanë të vetëm shqiptarët në kohën e pandemisë, që i masakruan në një hall kaq të madh shëndetësor. Dhe janë aty të pasuruar mbi fatkeqësinë, mbi shëndetin dhe mbi jetën e shqiptarëve. Është lista e cila përfundimisht provoi që asnjë iluzion nuk mund të ketë për këta banditë dhe kriminelë”, tha Vasili.
