Kryetari i grupit parlamentar socialist dhe demokrat në Parlamentin Europian, Gianni Pittella deklaron se njerëzit që ikin nga lufta duhet të pranohen si azilantë në BE.
Ai thotë se BE duhet të bashkëpunojë ngushtë me Shqipërinë që të pengojne çdo përpjekje të trafikantëve me gomone, për ta shndërruar në biznes kriminal udhëtimin e dëshpëruar të sirianëve.
TCH: Zoti Pittella, ju u treguat kritik ndaj tij, në Athinë, për qëndrimin e ‘mbylljes së kufijve’. Si duhet të sillet Shqipëria me emigrantët?
Gianni Pittella: Unë nuk kam qenë kurrë kritik ndaj Edi Ramës. Unë them se për azilkërkuesit, nuk ka paqartësi. Kush është refugjat dhe kërkon azil sepse po ikën nga lufta, i duhet dhënë azil. Nuk ka alternativa. Duhet dhënë azil e njerëzit duhen trajtuar në mënyrë dinjitoze. Prandaj, jam për pranimin e tyre dhe për luftën ndaj trafikut të klandestinëve. Këto janë dy pika të rëndësishme dhe lufta duhet bërë bashkarisht, nga Shqipëria dhe Italia. Tani që është mbyllur kufiri mes Greqisë e Maqedonisë, mendohet se ndonjë trafikant i ‘vdekjes’ mund të zgjedhë rrugën ballkanike përmes Shqipërisë dhe Italisë. Tashmë madje po dëgjojmë se për një varke prej 9 metrash, kushton 9 mijë euro. Pra, një ndyrësi totale. Këtyre trafiqeve duhet t’u kundërvihemi përmes një bashkëpunimi të fortë ndërmjet Italisë dhe Shqipërisë.
TCH: Pse Shqipëria duhet të presë emigrantët, kur lufta në Siri nuk është problem i krijuar prej saj dhe kur vetë vendet anëtare të Unionit nuk pranojnë t’i strehojnë dhe nuk respektojnë marrrëveshjen e shpërndarjes së tyre?
Gianni Pittella: Ka një detyrë të përcaktuar për të gjithë, prej nga renditen vendet. Ka një detyrë morale, civile dhe juridike për të pritur refugjatët. Edhe nëse Shqipëria mund të thotë se nuk ‘më intereson’, megjithëse lufta në Siri i intereson, i intereson gjithë botës, për shkak të pasojave të kësaj lufte në gjithë botën, vendet europiane duhet të bëjnë shpërndarjen. Me të drejtë, nëse i kërkojmë Shqipërisë të bëjë pjesën e saj, duhet t’u kërkojmë vendeve tona europiane, së pari, që të bëjnë pjesën e tyre. Nuk janë të gjithë, pasi ka vende që pranojnë me mijra e mijra refugjatë dhe emigrantë. Por, ka disa vende, që nuk e bëjnë këtë dhe këto vende duhen ndëshkuar. Nuk mund të ketë sanksione ekonomike veç për ato vende, që kapërcejnë me zero presje zero paktin e stabilitetit. Duhet të parashikojmë sanksione politike e dënime për shkeljet e bëra nga ato vende europiane, që nuk respektojnë vendimet e marra.
/ Top Channel
