Partia Demokratike dhe Lëvizja Socialiste për Integrim do të konkurojnë me lista të ndara në zgjedhjet parlamentare të 25 prillit. Dy partitë kryesore të opozitës pritet të kenë lista të përbashkëta kandidatësh në vetëm 3 qarqe, ndërkohë që Lulzim Basha arriti që të krijojë një koalicion me 13 parti, përfshi këtu edhe Frymën e Re Demokratike.
Në anën tjetër LSI do të ketë mbështetjen e PDS së Paskal Milos.
Por a do të duhej që dy partitë kryesore të opozitës së bashkuar të kishin konkuruar në një koalicion?
Ish-ministri i Drejtësisë Ylli Manjani thotë se dalja me një listë të përbashkët do të ishte zgjidhja më e mirë për të zbutur efektin e ndryshimeve të njëanshme të bëra pak para zgjedhjeve, por gjithsesi sipas tij fakti që Basha mundi të mbledhë në një koalicioni aq shumë parti dhe aq të ndryshme nga njëra-tjera tregon se fryma e bashkimit për një rrezik më të madh është e pranishme.
“Nuk është e thjeshtë, por ajo që kam thënë është më shumë se sa bashkimi është mesazhi politik që jep. Vendi është në rrezik, kemi një lider të fortë që mund të qeverisë përjetë.
Ky është risku që po jetojmë, është risk real. Nëse në Shqipëri zgjatet jeta e një mandati të një kryeministri si Rama që është kalbur si model politik, nëse ai merr sërish vota Shqipëria është komuniste. Janë modele që ne kemi hequr shumë për t’i larguar”, tha Manjani në studion e Euronews.al.
