Partia Demokratike pritet të depozitojë sot në KQZ kërkesën për regjistrimin e koalicionit që do të emërtohet “Shqipëria Fiton”.
Në këtë koalicion përfshihen PR, LZHK, PDIU, PBDNJ, PDK, por edhe subjekte të tjera, ndërsa vijojnë negociatat në aspektin teknik për përfaqësimin e këtyre partive në listën shumëemërore të demokratëve sipas qarqeve.
Nga raportimet mësohet se deri më tani, Basha ka zyrtarizuar marrëveshjet me drejtuesit e partive, lidhur me kandidimin e tyre, ku Agron Duka i PAA-së do të garojë në qarkun e Durrësit, Nard Ndoka i PDK në Shkodër, Vangjel Dule i PBDNJ në Korçë ose Vlorë, Fatmir Mediu i PR në Tiranë dhe Shpëtim Idrizi në Tiranë, Fier ose Vlorë, nëse Dule do të kandidojë në Korçë.
Të gjithë drejtuesit e partive opozitare do të përfshihen në atë që konsiderohet si lista fituese, ndërkohë që negociatat vijojnë për emra të tjerë të propozuar nga aleatët, që mund të kandidojnë në pozicione më poshte listës. Marrëveshja do të synojë që nëse këta kandidatë marrin vota më shumë se mesatarja në rang Qarku për 1 mandat, atëherë ato do të marrin mandatin. Kjo formulë synon të maksimalizojë votat jo vetëm partiake, por edhe ato individuale.
Kolaicioni me të cilin opozita do të kandidojë përballë socialistëve quhet “Shqipëria Fiton” dhe do të nënshkruhet ditët e sotme nga Basha dhe aleatët e tij. Pjesë e koalicionit mësohet se do të jenë të gjitha partitë pjesëpërbërse të Opozitës së Bashkuar me përjashtim të LSI-së, e cila pritet të dal me listën e saj në zgjedhjet e përgjithshme.
Ditën e djeshme kryedemokrati Basha pati një takom kokë më kokë me Monika Kryemadhi, takim ky i cili zgjati rreth 90 min dhe arriti në vendimin e daljes në lista të veçanta të LSI-së dhe PD-së më 25 Prill.
Të gjithë partitë që do të jenë në koalicion me PD janë regjistruar në KQZ, por emrat e kandidatëve të tyre do të jenë të përfshirë në listën e Partisë Demokratike dhe do të bëhen publike në 5 mars.
