Presidenca ka reaguar, ndaj ironisë së Kryeministrit Edi Rama për Kreun e Shtetit, Ilir Meta, pasi DASH renditi ish-kreun e KED Ardian Dvoranin mes 12 kampionëve kundër korrupsionit.
“O faqezi, Ramaforma jote ngordh më 25 prill me 3 milion shpulla dhe shkelma të shqiptarëve, kundër teje, oligarkëve dhe diplomatëve të korruptuar deri në palcë. Shqipëria e para dhe e pamposhtur” shkruan zëdhënësi i Metës, Tedi Blushi.
Meta dhe Dvorani kanë pasur përplasje të forta mes tyre sa i takon anëtarëve të Gjykatës së Lartë dhe asaj Kushtetuese.
Për vlerësimin e Dvoranit nga DASH reagoi dhe kryeministri Rama, i cili tha se ky është një inkurajim i jashtëzakonshëm për të gjithë ata që luftojnë për reformën në drejtësi.
“Vlerësimi i lartë i Sekretarit të ri të Shtetit për Ardian Dvoranin, është një inkurajim i jashtëzakonshëm për të gjithë ata që luftojnë për Reformën në Drejtësi në këtë fazë kacafytjeje me të Keqen ku ka hyrë reforma dhe një riafirmim i angazhimit të SHBA në luftën për Reformën!
Ardian Dvorani u godit harbutërisht pikërisht se nuk iu dorëzua presionit të së Keqes dhe ky vlerësim rrezatues e shkrin krejt atë baltë imoraliteti politik e mediatik, që u hodh pa kursim mbi të, duke provuar edhe njëherë se e drejta vonon po nuk harron”, shkruante Rama.
Në Shqipëri, veprimtaria e Ardian Dvoranit në krye të Këshillit të Emërimeve në Drejtësi është kritikuar fort nga Presidenti Ilir Meta, i cili madje e ka paditur në SPAK për shkelje të procedurave në përzgjedhjen e anëtarëve të Gjykatës Kushtetuese.
