Një ditë më parë në stadiumin Air Albania nisi vaksinimi i grupmoshës 80 vjeç e lart, ndërsa të parët që morën vaksinën kundër Covid ishin disa personalitete, mes të cilëve artistë, aktorë, ish-politikanë të lartë.
Kryeministri Edi Rama nxitoi të sulmonte kritikët lidhur me përzgjedhjen e emrave për vaksnim, ndërkohë që ai e konsideroi procesin si një simbol. Por mes deklaratave të shumta, Rama tha se përveç atyre që ai i konsideron si personalitete, do të vaksinohen edhe njerëzit e thjeshtë, duke bërë një ndarje që as moralisht dhe as ligjërisht, nuk i shkon një Kryeministri.
Përtej çdo debati, ajo që nuk thuhet është se si u përzgjdhën personalitetet, pra çfarë kriteresh ishin vendosur që disa të quhen personalitete dhe të tjerë jo.
Zv.ministrja e Shëndetësisë, Mira Rakacolli, ka hequr çdo përgjegjësi nga strukturat drejtuese të shëndetësisë, duke ia hedhur topin mjekëve.
Rakacolli tha se janë mjekët e familjeve të çdo qendre shëndetësore në Tiranë ata që kanë përzgjedhur personalitetet që u vaksinuan sot në kryeqytet, duke u bazuar tek mosha si kriter i kryesor.
“Nga çdo qendër shëndetësore e Tiranës u përzgjodhën nga mjekët e familjes duke pasur si kriter në radhë të parë moshën dhe duke parë gjendjen shëndetësore të tyre. Ishin vetë mjekët e familjes, ata që janë përgjegjës për ruajtjen e shëndetit dhe për kurimin e tyre, që i përzgjodhën ata. Kështu që janë vaksinuar rreth 80 veta nga gjithë Tirana të përzgjedhur vetëm nga mjekët e familjes” tha Rakacolli në Klan News.
Por duket se kjo deklaratë e Rakacollit është një shfajësim, pasi sot në Tiranë mund të gjesh shumë më tepër qytetarë, që kanë sëmundje që konsiderohen me risk të lartë nëse preken nga Covid-19, që nuk ishin në atë listën e personaliteteve.
Dhe duket se pas show dhe propogandës së një dite më parë, të cilën nuk mund të mos e linte pa e përdorur Edi Rama, duket se Rakacolli është përzgjedhur për të thënë se listat e personaliteteve nuk ishin përzgjedhur nga ndonjë Komision, ose nga “Krye-epidemiologu” Edi Rama,por nga mjekët e familjes. Ndërkohë që vetë Rama një ditë më parë deklaroi se “përzgjedhja e personaliteteve ishte bërë për të mos kujtuar njerëzit që kanë sakrifikuar nga vetja e tyre për të dhënë vlera, kur ato ndahen nga jeta”. Të paktën kjo deklaratë e Ramës është shumë më e ndershme se sa justifikimi që tenton të gjejë Rakacolli, duke ia hedhur përgjegjësinë mjekëve të familjes.
