Faqja e “Lolitës” në Facebook kishte publikuar sot një status të gjetur lidhur me sulmin e “Rilindjes” ndaj studentes Mirela Ruko që hodhi salcë ndaj ministres së Arsimit Lindita Nikolla.
“Linditës i hodhën pak salcë mbi kokë dhe u indinjuan të gjitha parukieret e Tiranës, bashkë me Elisën, Delinën, Mimin, Oltën etj. Mamasë së Arditit ia hodhën djalin e pajetë në plehrat e Sharrës dhe askush nga të lartpërmendurat nuk e mori mundimin ta ngushëllonte apo të solodarizohej me të”, shkruante Lolita.
Një e vërtetë e hidhur kjo.
Të gjitha gratë e Partisë Socialiste heshtën për këtë krim, duke mos thënë asnjë fjalë për një nënë që iu vra djali nga korrupsioni i kryetarit të Bashkisë së Tiranës, Erion Veliaj.
Ardit Gjoklaj ishte vetëm 17-vjeç.
Punonte për të blerë librat e shkollës.
Pikërisht Veliaj që sot solidarizohej me Lindita Nikollën, duke u hequr si i revoltuar, kur nuk tha asnjë fjalë të vetme për nënën që me korrupsionin e tij çoi drejt vdekjes djalin e saj.
Por këto gra socialiste nuk reaguan për një tjetër grua.
Nuk reaguan për gazetaren Alida Tota që u shkarkua nga puna pse po hetonte për landfillin e Sharrës.
Nuk thanë kurrë një fjalë për të, dhe pse gazetarja mbeti e papunë nga presioni i pushtetit.
Ndërsa për kolegen e tyre vunë kujën në qiell, duke kujtuar se ajo është një grua. Ndërsa për gratë e tjera, si për nënën e Arditit dhe për Alida Totën, gratë e PS harruan që ekzistonin.
Ja pra, ky është standardi i dyfishtë i grave të PS që dalin me urdhër të Ramës duke humbur dinjitetin e tyre.
