Ende nuk ka marrëveshje mes PD-së dhe PR-së për listat e kandidatëve për deputetë për zgjedhjet e 25 prillit. Mbrëmjen e sotme përfundoi takimi i Lulzim Bashës me Fatmir Mediun në selinë e PD-së, por pa një pakt mes tyre.
Kreu i Republikanëve i pyetur sa është numri i kandidatëve që ai kërkon që të jenë në listën fituese, u shpreh se “Ka një analizë të thjeshtë bazuar te referenca e votave të marra në zgjedhje.
Por pavarësisht kush është emri në listë, PR do të jetë kontributore për të marrë vota edhe në zona ku nuk ka pretendime për mandate, por për të kontribuar për koalicionin” tha ai.
Gjatë prononcimit për mediat ai kishte edhe një kërkesë për Partinë Demokratike. “Programi i PD është i plotë, por duhet të përfshihen edhe idetë e partive të tjera” tha ai, referuar forcës që drejton.
Gjithashtu ditën e sotme lideri demokrat ka pasur një takim edhe me Shpëtim Idrizin për detajet e marrëveshjes. Deri tani Lulzim Basha ka arritur dakordësinë me Agron Dukën, Nard Ndokën dhe Dashamir Shehin, por dy aleatët e tjerë nuk kënaqen me nga një mandat të sigurt.
