Të ikësh nga vendi nuk është fundi i Botës. Kështu ka deklaruar Kryeministri Edi Rama nga Vlora, ku zhvilloi një bashkëbisedim me qytetarë, duke iu përgjigjur akuzave që i bëhen Qeverisë së tij lidhur me shpopullimin.
Rama tha se fenomeni i emigracionit është një fenomen global që nuk ka lidhje me qeverisjen e tij, ndërsa shtoi se e vetmja periudhë kur shqiptarët nuk kanë dalë nga vendi është koha e Enver Hoxhës. Ai tha se nuk mund të ndalojë të rinjtë që duan të largohen pasi kjo ka ndodhur në çdo kohë pas vitit 1990.
“Aeroportet nuk javë vetëm stacione autobuzi. Sjellin njerëz që duhet të hanë të flenë të konsumojnë kënaqësi të ndryshme përmes atraksioneve të ndryshme. Duhet të shkojnë në aktivitete artistike. Duhet të marrin shërbime shëndetësore. Kështu që është kjo arsyeja pse 1 euro e investuar në një aeroport sjell 24 euro të tjera. Këto struktura, hotelet që do të shtohen, shërbimet që do të shtohen do kërkojnë punonjës. Kjo do të sjellë edhe rritjen e pagës sepse cilësia e shërbimit duhet të jetë më e lartë.
Perspektiva është aty. Ka një gjë që unë e them dhe do e them që jetojmë në një fazë historike ku trendi i largimit të të rinjve nga vendi është negativ. Më shumë ikin se vijnë. Ky është një fenomen global. Shqiptarët vetëm në një periudhë nuk kanë dalë kur i mbylli Enver Hoxha në kafaz dhe i bëri si gardelina që duhet të këndonin vetëm këngët e partisë. Në të kaluarën shqiptarët kanë qenë një popull që ka lëvizur gjithmonë.Jetojmë në një kohë tjetër. Këtu bëhet propagandë me këtë.
Nëse unë e shoh në aspektin e ikjes së të një të riu që nuk e gjen veten këtu është sikur më ikën një qelizë nga gjaku im. Por shqiptarët kanë lëvizur që në ’90. Por shifrat që jepen këtu janë çmendurira. Nëse shkon sot në fshat është eksperienca e atyre që janë kthyer nga emigracioni që i ka dhënë një shtytje. Trendi historik do të kthehet por këtë nuk e vendos dot as unë. I patë dje ata italianët që vijnë këtu se është më mirë”, tha Rama.
Rama u shpreh se puna e bërë deri tani duhet të vazhdojë, ndërsa kërkoi mandatin e 3-të qeverisës, sikundër u shpreh ai për të vijuar me projketet për Shqipërinë.
Kryeministri deklaroi se të rinjtë që do të futen të fushën e kodimit për të fituar paga mujore deri në 6 mijë euro do të trajnohen në qendra. Rama u shpreh se janë 2.4 mln vende të lira pune në të gjithë botën ku të rinjtë mund të punojnë pa u larguar nga fshati apo qyteti ku ata jetojnë.
“Rikonceptimi i sheshit të flamurit ka qëllim vlerësimin e elementëve historikë të sheshit. Është pjesa e trashëgimisë në ato godina. Është pjesa që ka të bëjë me atë zonën arkeologjike në shesh. Që ka të bëjë me varrin e Ismail Qemalit.
Varrezat e dëshmorëve. Karabinaja e Sulos është futur në procedurës shpronësimi për të transformuar pjesën tjetër në një qendër publike e cila do të ketë funksione të ndryshme duke i ofruar hapësira të gjitha moshave me një bërthamë të rrjetit të inovacionit digjital që do i shërbejë të rinjve për të marrë kurse për të mësuar kodimin për t’u përfshirë në tregun global të punës online gjë që është e ardhmja për të rinjtë në aspektin e punësimit dhe ti vetëpunësohesh për të dhënë shërbime në një treg që sot që flasim ka 2.4 mln vende të lira pune”, tha Rama.
