Nisma Thurje është regjistruar zyrtarisht si parti në Komisionin Qendror të Zgjedhjeve, duke shfrytëzuar mandatin e deputetes Rudina Hajdari, dhe duke mos e parë të nevojshme mbledhjen e 5 mijë firmave të qytetarëve.
Regjistrimi është bërë sot në ambientet e KQZ-së, në dalje të të cilës përfaqësuesi Endri Shabani tha se vendi ka nevojë që të zhdukë kastën e vjetër politike, që mban peng të ardhmen e vendit.
Ndërkohë që në shkresën e depozituar në KQZ, thuhet se kryetar i Thurjes është zgjedhur pikërisht Endri Shabani, i cili ende nuk e ka përcaktuar qarkun nëse do të kandidojë për deputet në zgjedhjet e 25 Prillit.
Sa i takon përfaqësuesve të tjerë, Rudina Hajdari e ka shpallur kandidaturën e saj për deputete në qarkun e Elbasanit, ndërsa Pano Soko në Tiranë.
Çdo partie jashtëparlamentare i duhen të paktën 5 mijë firma për regjistrim në KQZ, mirëpo Nisma Thurje e ka pasur më të lehtë rrugën, duke marrë parasysh se prej muajsh u është bashkuar deputetja Hajdari.
