Epidemiologu Fabian Cenko tha mbrëmjen e sotme në emisionin “Open” se nëse do të dyfishohen testimet, do të kemi dy herë më tepër raste të reja me Covid-19.
Cenko tha se dy javët e fundit Shqipëria ka pasur numrin më të lartë në Europë lidhur me infektimet e reja, pas Greqisë.
Ai tha se shqetësuese mbetet situata e pacientëve në spitale, ku shifrat duket se po arrijnë maksimalen, ndaj dhe duhet që spitalet rajonale të mbajnë peshë në këtë situatë.
“Problem është respektimi i masave, dhe jo shtimi i masave. Mund të shtosh masat, por nëse nuk respektohen, atëherë nuk do të kemi rezultate.
Vlerësimet epidemiologjike janë dhe duhet të jenë në themel të masave. Pasja e këtyre të dhënave na ndihmon që të marrim masat e duhura. Pse mbyllen shkollat e mesme dhe nuk mbyllen shkollat 9-vjeçare, pse nuk mbyllet një qark dhe jo një qark tjetër”, tha Cenko, duke shtuar se “ne sot nuk e dimë se sa testime janë bërë në gjimnaze që u vendos mbyllja e shkollave”.
