Programi i paraqitur nga Partia Demokratike, në kuadrin e zgjedhjeve të 25 qershorit, vijon të shqetësojë Rilindjen, Kryeministrin dhe ministrat.
Ndërsa Edi Rama gjatë daljeve publike ka preferuar që të tregojë barcaleta apo të bëjë humor me programin e paraqitur, ministri i Rindërtimit, Arben Ahmetaj, një prej pjesëmarrësve në darkën në Dubai në restorantin luksoz “Nusret”, u shpreh sot nga foltorja e Kuvendit, se ai i ngjan programit të Sudes.
“E mbani mend në 1996 kur thonin “Me ne fitojnë të gjithë” dhe doli Sudja që e çoi vendin në greminë. Sot thonë se me programin tonë fiton Shqipëria, ndërkohë që në vitin e dytë të qeverisjes, nëse zbatohet ai program, Shqipëria falimenton”, tha Ahmetaj.
Sipas tij, në programin e PD jepen shembuj lidhur me taksat e bizneseve që tregtojnë sufllaqe, ndërkohë që këto biznese sot nuk paguajna taksa.
“Thonë se do ulin taksat e bizneseve që sot nuk paguajnë. Thonë se do japin libra falas, ndërkohë që Qeveria ka dy vjet që librat i jep falas”, tha Ahmetaj, partia e të cilit ende nuk ka një program lidhur me atë se çfarë mund të ofrojnë në mandatin e 3-të që synojnë të qeverisin vendin.
