Kryeministri Edi Rama deklaroi sot se ka sinjale të arsyeshme se në Shqipëri kanë hyrë variantet e reja të Covid-19. Rama tha se po bëjmë gjithçka që mos kthehemi te masat e forta kufizuese, por shtoi se duhet një motivim ka gjithsecili për respektimin e masave.
“Janë shtuar infektimet, janë shtuar të shtruarit në spitale, është ulur mosha e personave që infektohen. Natyrisht që masat që janë në fuqi janë masa që në këndvështrimin e ekspertëve të Komitetit Teknik funksionojnë, por duhet të zbatohen ashtu sikundër duhet”, tha Rama.
Sipas tij, autoritetet që janë përgjegjëse për zbatimin e masave, kanë pasur një qasje këshilluese, sesa represive.
“Në javët e fundit vihet re një rënie e angazhimit të qytetarëve, duke filluar që nga vendosja e maskës kudo, duke vazhduar me zbatimin e rregullave të vendosura për njësitë tregtare dhe natyrisht edhe me ekseset e patolerueshme në lokale të caktuara apo qoftë edhe nga politikanët, dhe këtu nuk kam parasysh vetëm atyre të opozitës, por edhe atyre që janë pjesë e PS, që shkelin rregullat duke u mbledhur në salla dhe dhoma mbi numrin e përcaktuar nga Komiteti Teknik”, tha Rama.
Sipas tij, jemi në kushtet kur mund të shmangim situata problematike për sistemin shëndetësor, edhe pse nuk kemi shqetësim lidhur me këtë.
“Duhet të veprojmë tani, të zbatohen masat, për të shmangur situata të papranueshme”, tha Rama. Sipas tij, për të mos rikthyer masat kufizuese, duhet një seriozitet maksimal në zbatimin e tyre.
