Të tjera detaje raportohen se janë zbuluar nga ekzekutimi në Vlorë i Gentian Qarrit. Ngjarja ndodhi rreth orës 18:00 të së shtunës, ndërsa policia ka marrë në pyetje 15 persona, dëshmitarë të rastit apo banorë të zonës.
Nga raportimet mësohet se gjithashtu janë pyetur edhe familjarët apo të afërmit. Për sa i përket dëshmitarëve ata janë shprehur se kanë parë një automjet që vinte drejt viktimës dhe ku brenda tij dukeshin e pakta dy persona, të cilët sapo panë viktimën janë zhvendosur me shpejtësi drejt tij dhe kanë goditur me breshëri nga automjeti.
Nga dëshmitë e mbledhura nga policia, mësohet se autorët e dyshuar ishin të maskuar dhe janë zhvendosur me shpejtësi drejt pyllit të sodës.
Automjeti që u dogj te Pylli i Sodës, me targa greke, ishte i vjedhur në vendin fqinj Greqi. Arma dyshohet e modelit 54.
Dyshohet se mbi viktimën është derdhur një karikator i plotë, ndërsa një pjesë e gëzhojave janë gjetur në vendngjarje. Ndërsa plumbat kanë përshkuar edhe disa në automjetet e parkuara pranë, si dhe në trupin e viktimës.
Qarri ka marrë plumba në kraharor dhe këmbë.
Pista kryesore e hetimeve mbetet dënimi i tij në Itali. Dyshohet se autorët e kanë ditur rutinën e përditshme të tij dhe kanë pritur sa ka dalë nga shtëpia e më pas e kanë ekzekutuar.
Burimet nga policia e Vlorës konfirmojnë se mund të jetë vëzhguar për disa ditë.
