Partizani siguroi tre pikë të rëndësishme në Ballsh pas fitores 1-2. Vllaznia kryesuese humbi dje me Laçin dhe “demat” e Ilir Dajës janë vetëm 6 pikë larg kreut.
Golat e fitores u realizuan nga Erald Çinari dhe Tedi Cara, të cilët folën pas ndeshjes për Supersport.
Cara – “Katër gola sezonal? Jam stërvit mjaft mirë në fazën përgatitore, kam dhënë gjithmonë maksimumin. Çdo gol është i rëndësishëm, shpresoj të vazhdoj me gola dhe asiste për skuadrën. Sot ishte i rëndësishëm, pasi luanim në një fushë të vështirë dhe ishte goli i dytë.
Fitorja e Laçit me Vllazninë? Çdo gjë do të ishte e kotë nëse nuk do të fitonim sot. Rëndësi ka të bëjmë detyrën tonë dhe të fokusohemi te vetja jonë. Hapësirat duhet t’i kërkosh, duhet të luftosh. Trajneri më ka mbështetur. Kam luftuar për këto minuta, shpresoj t’ia kem shpërblyer.
Vjet ishte një momenti i keq. Humba atë rast vjet ndaj Bylis, mund ta dërgonte Partizanin në Europa League, u dëshpërova shumë. Shpresoj ta kem kaluar atë moment mërzitje me golin e sotëm”.
Çinari – “Ka kenë një periudhë e gjatë pushimi. Humbja e Vllaznisë? Ata janë me meritë aty ku janë, por nuk janë larg. e kam thënë edhe kur ishin 9 pikë larg. Tani janë 6 pikë, është edhe gjysma e kampionatit. Do vazhdojmë kështu siç jemi dhe shpresojmë të arrijmë objektivat në fund të sezonit.
Alternativë më shumë se titullar? Besoj, vitin e parë që erdha këtu, kisha një periudhë 3-mujore që isha pa ekip. As nuk kisha bërë stërvitje, tre muaj janë shumë. M’u dha mundësia në ndeshjet e fundit, i shfrytëzova mundësitë. Për vitin e dytë dola golashënues i ekipit dhe jam aktivizuar rregullisht. Këtë vit qëndrova gjashtë muaj jashtë”.
