Nënkryetari i Lëvizjes Socialiste për Integrim, Petrit Vasili gjatë një interviste për Fax News u shpreh se 25 prilli nuk është momenti i rëndësishëm vetëm për fitoren e opozitës, por edhe për vendosjen e një standardi të ri politik.
Ndër të tjera, Vasili nuk la pa sulmuar qeverinë, duke e akuzuar se policinë e shtetit po e përdor për të inkurajuar krimin dhe jo për ta luftuar atë, dhe për këtë arsye vendi është në një situatë kritike.
“Rezultati i 25 prillit është absolutisht jetik jo thjesht dhe vetëm për partitë opozitare që marrin pjesë, por është një moment shumë i rëndësishëm në një ndarje të madhe pasi politikisht në pikpamje të demokracisë, në pikëpamje të funksionimit të shtetit të drejtës, të institucionit të zgjedhjeve dhe kryefjala të gjithëve, ekonomisë, po përjetohen momente vërtetë kritike, të cilat cilado qoftë propaganda, janë kaq të qarta në sytë e publikut saqë 25 prilli nuk është thjesht dhe vetëm momenti i rëndësishëm i fitores së opozitës, por është vendosja e një standardi të ri politik.
Kemi një borxh miliardësh përsa i takon PPP-ve edhe konçensioneve të cilat nuk kanë prodhur një vepër të madhe, që pas 8 vjetësh të thonë këto miliarda prodhuan një vepër të madhe të rëndësishme infrastrukturore apo shërbimesh.
Kemi njëkohësisht një borxh publik që shqiptarët duhet ta dijnë, është një borxh kaq i rëndë i cili do të jetë një prange e fortë në këmbët e Shqipërisë dhe do ta vuajnë shqiptarët për një kohë të gjatë për shkak të papërgjegjshmërisë edhe korruptimit.
Për fat të keq, kemi një pushtet i cili policinë nuk e përdor për të luftuar krimin, por e përdor për të inkurajuar krimin dhe detyrohet që të gjitha dosjet dhe materialet të vijnë nga Evropa, nga anti-mafia italiane, vijnë nga shërbimet gjermane vijnë nga të gjitha anët dhe këtu nuk ka asnjë përgjigjje. Edhe këtu është për të vendosur standardin. Do të qeverisi shteti apo krimi. Do të qeverisin trafikantët apo qytetarët do të jenë të qetë. Është një situatë kaq kritike që nuk ka ekzistuar kurrë. Për pastrimin e parave ne jemi rikthyer sërisht në listën gri”- u shpreh Vasili.
