Partia Demokratike nuk ka arritur ende një marrëveshje me dy prej aleatëve të saj, PR e Fatmir Mediut dhe PDIU e Shpëtim Idrizit.
E ndërsa marrëveshjet janë arritur me LZHK e Dashamir Shehit, i cili do të garojë në një vend të sigurtë në listën e Tiranës, PAA e Agron Dukës që gjithashtu do të jetë një nga 3 emrat e parë në listën e Durrësit dhe PDK e Nard Ndokës që do tv garojë gjithashtu në një prej vendeve të sigurta në Shkodër, pritet që negociatat të vijojnë me PDIU-në dhe PR.
Sipas burimeve, kreu demokrat Lulzim Basha do të takohet këtë të shtunë me Shpëtim Idrizin, partia e të cilit kërkon më shumë se 1 vend të sigurtë në listat e kandidatëve të PD. Për këtë PDIU ka paraqitur edhe një bilanc mbi numrin e votave që kjo parti ka marrë në zgjedhjet e fundit, si dhe shpërndarjen e tyre sipas qarqeve.
Qarku ku do të pozicionohet Idrizi dhe kandidatët e PDIU-së në listë duket se mban peng dhe marrëveshjen me Vangjel Dulen, i cili nuk dëshiron një përballje në të njëjtën zonë.
Gjithsesi burime nga PD theksojnë se Dule mund të garojë mes 4 emrave të parë në Qarkun e Korçës, ndërsa duket se problematike mbetet fakti se PDIU dhe PR kërkojnë 3-4 emra në atë që konsiderohet si lista e sigurtë e kandidatëve.
Kurse negociatat me aleatin republikan, Fatmir Mediu po vijojnë ende. Mësohet se ai i ka dërguar demokratëve propozimet e reja dhe është ende në pritje të një përgjigjeje.
Në 6 mars duhet të dërgohen në Komisionin Qendror të Zgjedhjeve listat finale të kandidatëve për deputetë. Formati i fletës së votimit miratohet më pas.
