Tritan Shehu, ish-ministër i Shëndetësisë, deklaroi mbrëmjen e sotme në emisionin “Open” se 975 dozat e para që mbërritën në Shqipëri ishin kontrabandë dhe nuk kishin asnjë dokument shoqërues.
Shehu ngriti pikëpyetje lidhur me sigurinë e vaksinave, ndërsa tha se Agjensia e Barnave duhej të publikonte dokumentacionin që shoqëronte këtë parti vaksinash.
“Sollët vaksina kontrabandë, pa dokumente shoqëruese, janë vaksina kontrabandë në shkelje të ligjeve. Nuk ka asnjë vend të BE që thotë po ua japim po mos tregoni. E dini ju që në Gjermani ka nisur një hetim mbi këto vaksina që sollët ju”, iu drejtua Shehu, ish-ministrit të Shëndetësisë në qeveritë e PS, Gjergji Koja.
Shehu tha se është e turpshme ajo që po ndodh me vaksinat në Shqipëri, duke theksuar se janë shkelur ligjet jo vetëm shqiptare, por edhe ato ndërkombëtare, lidhur me medikamentet.
“Çdo medikament, qoftë edhe paracetamol shoqërohet me një dokumentacion që tregon sigurinë e tij”, tha Shehu.
