Portugalia votoi ditën e premte legalizimin e eutanazisë, duke u bërë vendi i shtatë në botë që lejon të sëmurët terminalë t’i japin fund jetës së tyre me vullnet të lirë dhe asistencë nga mjekët.
Ligji u jep këtë të drejtë individëve mbi 18 vjeç, të cilët vuajnë nga sëmundje terminale, që kanë dhimbje të qëndrueshme dhe të padurueshme dhe që janë të aftë mendërisht për ta marrë vetë një vendim të tillë.
Procesi do të jetë i hapur vetëm për shtetasit kombëtar dhe banorët e ligjshëm në mënyrë që të parandalojë udhëtimin drejt Portugalisë për të marrë ndihmë mjekësore për t’i dhënë fund jetës së tyre.
Ligji është tani në duart e presidentit Marcelo Rebelo de Sousa, një konservator, për t’u firmosur. Presidenti portugez është shprehur dhe më parë se do të respektojë votën e parlamentit.
Në një letër drejtuar parlamentit, dy grupe që administrojnë shumicën e shtëpive të kujdesit në Portugali, të cilat u goditën rëndë nga pandemia, thanë se “miratimi i eutanazisë përfaqëson një mungesë respekti për të gjithë këta njerëz”.
Portugalia, një vend me shumicë katolike, i cili kaloi një pjesë të madhe të shekullit të 20-të të sunduar nga një regjim fashist, që atëherë ka bërë hapa në reformat liberale duke mbështetur të drejtat e njeriut. Legalizoi abortet në 2007 dhe lejoi martesat e të njëjtit seks në 2010. /The Reuters
