Disa shtete kanë njoftuar të mërkurën se po shqyrtojnë mundësinë e njohjes zyrtare të një shteti palestinez përpara mbajtjes së Asamblesë së Përgjithshme të Kombeve të Bashkuara në shtator, në New York. Në një deklaratë të përbashkët të publikuar nga ministrat e jashtëm të këtyre vendeve, thuhet se njohja e shtetit palestinez shihet si një hap thelbësor drejt zgjidhjes me dy shtete. Ministrat kanë ftuar edhe vende të tjera t’u bashkohen këtij angazhimi.
Deklarata është nënshkruar nga ministrat e jashtëm të Australisë, Kanadasë, Finlandës, Zelandës së Re, Portugalisë, Andorrës dhe San Marinos vende që ende nuk e kanë njohur zyrtarisht shtetin palestinez. Në të njëjtën deklaratë janë përfshirë edhe vende që tashmë e kanë njohur Palestinën, si Islanda, Irlanda dhe Spanja.
Kryeministri i Maltës, Robert Abela, paralajmëroi gjithashtu se vendi i tij do ta njohë shtetin palestinez gjatë Asamblesë së Përgjithshme të OKB-së në shtator. “Qëndrimi i vendit tonë tregon përkushtimin ndaj një zgjidhjeje të qëndrueshme për paqen në Lindjen e Mesme,” shkroi ai.
Në fillim të deklaratës, ministrat dënojnë sulmin e Hamasit të 7 tetorit, të cilin e quajnë “terrorist”. Ata kërkojnë një armëpushim të menjëhershëm, që të përfshijë lirimin e të gjithë pengjeve të mbajtura nga Hamasi si dhe lejimin pa pengesa të ndihmës humanitare në Gaza. Ministrat gjithashtu nxisin vendet e tjera të krijojnë marrëdhënie diplomatike me Izraelin dhe të shprehin gatishmërinë për ta integruar atë në rajon.
Deklarata u publikua në kuadër të Konferencës për Përparimin e Zgjidhjes me Dy Shtete, e cila u hap të hënën në selinë e OKB-së nën drejtimin e Francës dhe Arabisë Saudite. Të martën, Franca dhe Arabia Saudite shpallën mbështetjen e tyre për hapa konkretë dhe të kufizuar në kohë për zbatimin e kësaj zgjidhjeje.
Në një deklaratë të mëvonshme të përbashkët të bashkëkryetarëve të konferencës dhe përfaqësuesve të 17 shteteve të tjera, përfshirë Mbretërinë e Bashkuar, Italinë, Spanjën, Meksikën dhe Bashkimin Evropian, theksohet nevoja për t’i dhënë fund menjëherë luftës në Gaza. Aty thuhet se “Gaza është pjesë përbërëse e shtetit palestinez dhe duhet të bashkohet me Bregun Perëndimor”, duke theksuar se “nuk duhet të ketë as okupim, as rrethim, as reduktim territori dhe as shpërngulje të detyruar”.
Deklarata mbështet Autoritetin Palestinez si strukturën e vetme për qeverisje, rend dhe siguri në shtetin e ardhshëm palestinez. Gjithashtu, kërkohet që Hamasi t’i japë fund sundimit të tij në Gaza dhe të dorëzojë armët tek Autoriteti Palestinez. Mbështetje i jepet edhe angazhimit të presidentit Mahmoud Abbas për mbajtjen e zgjedhjeve demokratike në territoret palestineze zgjedhje që nuk janë mbajtur që prej vitit 2006.
Deklarata kërkon gjithashtu ruajtjen e status quo-së historike në Jerusalem, si dhe marrjen e masave kundër vendbanimeve të paligjshme dhe entiteteve që i mbështesin ato.
Në të njëjtën linjë me deklaratën e ministrave të jashtëm ishte edhe njoftimi i kryeministrit britanik, Keir Starmer, i cili deklaroi të martën se Mbretëria e Bashkuar do ta njohë shtetin palestinez nëse Izraeli nuk ndërmerr hapa seriozë për të përmirësuar “gjendjen e tmerrshme në Gaza” deri në shtator.
Pak ditë më parë, presidenti francez Emmanuel Macron kishte njoftuar se edhe Franca do ta njohë shtetin palestinez gjatë Asamblesë së Shtatorit. “Franca dëshiron paqe në Lindjen e Mesme,” deklaroi Macron.
