Pas Britanisë së Madhe, Australisë dhe Kanadasë, Portugalia ka shpallur këtë të diel njohjen zyrtare të Shtetit të Palestinës, në një deklaratë të bërë nga ministri i Jashtëm Paulo Rangel, gjatë një ceremonie në selinë e përhershme të Portugalisë në OKB, në New York.
“Deklarata e njohjes së Palestinës, e shpallur këtu sot, rrjedh drejtpërdrejt nga vendimi i Këshillit të Ministrave më 18 shtator, pas një procesi të gjerë konsultimi që përfshiu presidentin e Reublikës dhe shumicën dërrmuese të partive parlamentare,” deklaroi Rangel.
Ai theksoi se për çështjen e zgjidhjes me dy shtete si rrugë për paqen në konfliktin izraelito-palestinez, u arrit një qëndrim unanim nga të gjitha partitë e përfaqësuara në Parlamentin portugez.
Duke riafirmuar angazhimin për një paqë të drejtë dhe të qëndrueshme, qeveria portugeze deklaroi se mbështet të drejtën e Izraelit për ekzistencë dhe siguri, dënon ashpër sulmet terroriste të Hamasit më 7 tetor, lërkon lirimin e menjëhershëm të pengjeve dhe kthimin e trupave të të vrarëve në Izrael dhe kundërshton çdo formë antisemitizmi.
Ministri Rangel theksoi se njohja u bë vetëm pasi u përmbushën dy kushte të mëhershme të përcaktuara nga qeveritë e mëparshme, që ëvizja të bëhej në bashkëpunim me një grup shtetesh perëndimore me qëndrime të përbashkëta për këtë çështje dhe që deklarata të kishte efekt të prekshëm dhe të dobishëm në terren, si kontribut konkret për paqen.
“Qeveria portugeze dëshiron të forcojë miqësinë e thellë me popullin izraelit, por gjithashtu të thellojë marrëdhëniet e reja e premtuese me popullin palestinez,” u shpreh Rangel.
