Gjykata e Dyseldorf në Gjermani dënoi me 7 vite burg Ravsan.B, shtetas nga Taxhikistani, i cili akuzohet se ishte pjesë e një organizate terroriste, e cila kishte përgatitur dy vrasje në Shqipëri dhe Gjermani.
Sipas mediave gjermane, Ravsan. B pranoi të bashkëpunojë me drejtësinë gjermane, duke rrëfyer detajett, çka ndikoi më pas në dhënien e një dënimi më të butë.
Shtetasi nga Taxhikistani kishte shkuar në Gjermani në vitin 2011, ku edhe nisi të radikalizohej, ndërsa krijoi një celulë të Shtetit Islamik, e cila kishte për qëllim që të kryente sulme në Gjermani dhe Lindjen e Mesme.
Por për të financuar organizatën e tyre, ata kishin nevojë për të ardhura. Në këtë mënyrë, Ravsan B. pranoi që të vriste një biznesmen shqiptar për 40 mijë dollarë, për llogari të një shtetasi rus.
Sipas gazetës BILD, me një pistoletë dhe një bashkëpunëtor, Ravsan B. i bëri pritë shënjestrës në hyrje të një restoranti në Tiranë. Por vetëm për shkak se autorët kishin dyshime për identitetin e viktimës, sulmi u anulua në sekondat e fundit.
Një tjetër atentat i dështuar u organizua në Gjermani. Falë punës hetimore të policisë, atentati u parandalua në kohë.
