Kryerepublikani Fatmir Mediu, duke folur për 25 prillin, kërkon që grupi i negociatorëve në selinë blu të vlerësojë çdo kandidat potencial të republikanëve, që votat i përkthen në fitore të opozitës në zgjedhje.
“Ne mund t’i referohemi çdo lloj rezultati elektoral, si të Partisë Demokratike dhe të Partisë Republikane apo partive të tjera, për të përcaktuar se ku është fasha elektorale e Partisë Republikane, ku është fasha elektorale e Partisë Demokratike, si është shtrirja gjeografike e votave të Partisë Republikane, dhe në të gjitha qarqet, se ku e ka vendin Partia Republikane, në renditjen e kandidatëve”, thekson Mediu.
Deklaratat e kreut republikan vijnë në një kohë kur PR ende nuk ka arritur një marrëveshje me PD lidhur me përfaqësimin në zgjedhjet e 25 prillit, ndërsa një marrëveshje të tillë deri më tani e kanë nënshkruar me Lulzim Bashën, PAA e Agron Dukës, PDK e Nard Ndokës, LZHK e Dashamir Shehit dhe PBDNJ e Vangjel Dules.
Në kushte të tilla kreu republikan paralajmëron se PR është i përgatitur për të dalë në zgjedhje me ekipin e tij të kandidatëve.
“Ne do të vazhdojmë aktivitetet nëpër rrethe dhe deklarimin e kandidatëvetë Partisë Republikane dhe e them edhe njëherë, jo në dëm të koalicionit, jo në dëm të marrëdhënieve, por në shërbim të marrëdhënieve, por edhe për të qenë të përgatitur në rast të fundit, në qoftë se ne do të na duhet të dalim vetëm si Parti Republikane, gjë të cilën nuk e uroj asnjëherë”,-thotë më tej Mediu.
Ambicia e Mediut për të marrë më shumë se një kandidat të sigurtë në listën fituesve të Partisë Demokratike, duket se nuk është pranuar nga selia blu, pavarësisht pretendimit të kryerepublikanit për historikun e lartë të votave të përkthyera në mandate deputetësh që kjo forcë politike ka siguruar ndër zgjedhje.
Sipas raportimeve të deritanishme, Duka do të kandidojë në listën e sigurtë në Qarkun e Durrësit, Ndoka në Shkodër, Shehi në Tiranë dhe Dule në Vlorë. Ndërkohë që vijojnë negociatat me PDIU e Shpëtim Idrizit, i cili nvse arrihet marrëveshja do të kandidojë në Fier, ndërsa ka kërkuar një vend të sigurtë në listën e Tiranës, ku pritet të kandidojë Mesila Doda.
Deri më tani PD ka refuzuar propozimet e partive aleate për të përfshirë në listat e demokratëve, në atë që konsiderohet zonë e sigurtë, të më shumë se 1 emri.
