Tirana fitoi pas pesë barazimesh. Kundër Kastriotit bardheblutë ia dolën të fitojnë me përmbysje falë golave të Idriz Bathës dhe Ernest Muçit.
Pas ndeshjes trajneri Nevil Dede foli në emisionin “Gol pas Goli” në Supersport duke thënë se skuadra tregoi karakter në lojë çka solli edhe përmbysjen. Dede foli edhe për blerjen më të re, Taulant Seferi. Sipas 46-vjeçarit, sulmuesi pas futjes në fushën e lojës i dha skuadrës ritëm tjetër.
“Skuadra u shpreh mirë në tërësi, goditëm portën, vertikalizuam. Djemtë e merituan fitoren, treguan karakter. Nuk është e lehtë të kthesh rezultatin. Është një grup fantastik djemsh. Shpresojmë të na vijë edhe Vangjeli sa më shpejt.
“Seferi? Është lojtarë që ka cilësi, por ka edhe presionin e medias dhe opinionin. Më pëlqeu sot, pasi i dha skuadrës ritëm tjetër. Për mua ka rëndësi ta marrë shtruar dhe ta fusim gradualisht. Kjo i jep mundësinë të shprehet më mirë. Ka potencial dhe është një prurje shumë e mirë për ne”.
“Nuk kisha panik, ritmin po e kontrollonim. Pësuam nga një goditje standarde. Nuk kam folur fare, shpresoja që lojtarët të ishin të qetë. Po dilnim rrjedhshëm para dhe logjika e lojës ishte OK. Normal nuk e parashikoj dot se kur vjen goli, pasi nuk jam fallxhor”.
“Kur t’i vijë radha do mendoj për Partizanin. Ishim 4-4-2 në romb dhe kemi superioritet në qendër dhe në krah në inferioritet. Topin e kishim ne. Asgjë nuk ndodhi. Bëmë zëvendësime dhe jo çdo gjë shkon perfekt. Tension i rezultatit ka ndikimin e vet. Kastrioti doli nga krahët, por nuk na kapi bosh në qendër”- ka deklaruar Dede.
