Prezantimi i serisë së re të kartëmonedhave, do të vazhdojë edhe këtë vit përmes nxjerrjes në treg të dy prerjeve të reja, përfshirë edhe kartëmonedhën 10,000 lekë.
Banka e Shqipërisë njofton se kartëmonedhat 10,000 lekë do të hidhen në treg duke filluar që nga viti 2021. Gjatë 2021 do të hidhet në treg edhe formati i ri i kartëmonedhës 1,000 lekë, i ngjashëm me atë 5,000 lekë e cila u prezantua në shtator të vitit 2019. Duke filluar nga ky vit, do të hidhet në qarkullim edhe formati i ri i 2,000 lekëshit.
Kartëmonedhat përmbajnë një sërë elementesh sigurie që i mbrojnë nga falsifikimi dhe ruajnë besueshmërinë e publikut tek paraja.
“Përmirësimi i serive të kartëmonedhave me qëllim forcimin e elementeve të sigurisë dhe njëkohësisht përmirësimin e dizajnit është një praktikë e njohur në bankat qendrore, që përgjithësisht zbatohet çdo 15-20 vjet”, shkruan Banka e Shqipërisë.
Kartëmonedhat ekzistuese, të të gjitha prerjeve, do të vazhdojnë të qarkullojnë paralelisht me kartëmonedhat e reja. Ato do të vijojnë të kenë kurs ligjor dhe të shërbejnë si mjet pagese. Pamja e serisë së re përfaqëson evoluim dhe përmirësim të dizajnit të përgjithshëm dhe elementeve specifike të paraqitura në to.
Sipas Bankës së Shqipërisë, seria e re e kartëmonedhave është prodhuar me teknologjitë më të fundit në fushën e prodhimit dhe elementeve të sigurisë së kartëmonedhave, me qëllim që ato të jenë më të sigurta.
