Partia Demokratike pothuajse ka përmbyllur marrëveshjen me aletatët e saj për zgjedhjet e 25 prillit, ndërsa burime nga opozita bëjnë të ditur se ato do të përfshihen në listat e PD.
Kështu mësohet se PD është dakordësuar me LZHK e Dashamir Shehit, PR e Fatmir Mediu, PDK e Nard Ndokës, PAA e Agron Dukës, PDIU e Shpëtim Idrizit. Kjo do të përbëjë edhe bazën kryesore të koalicionit që do të drejtohet nga PD, ndërkohë që nuk vijim janë negociata me parti të tjera, të cilat mund të ndërtohen mbi baza rajonesh.
Raportohet se bazuar në marrëveshje Ndoka do të jetë pjesë e listës së kandidatëve në qarkun e Shkodrës, Shehi, Mediu dhe Idrizi në Tiranë, ndërsa Duka në Durrës. Mësohet se marrëveshja përfshin që në qarqet ku këto kanë peshë elektorale do të përfshijnë në listën e kandidatëve 2 deri 4 emra, bazuar në potencialet e kandidatëve dhe peshën elektorale të subjektit që përfaqësojnë.
Burime nga opozita bëjnë të ditur se gjithashtu marrëveshje rajonale nuk përjashtohet të ketë edhe me koalicionin që do të drejtohet nga LSI, në listën e të cilës gjithashtu mund të përfshihen emra nga parti opozitare, në qarqe të caktuara, me synim maksimalizimin e votave.
Pra sikundër raportohet skema e zgjedhur nga opozita për t´u përfaqësuar në zgjedhjet e 25 prillit pavarësisht se do të ketë dy koalicione zyrtare, një i drejtuar nga LSI dhe tjetrit nga PD është ajo e bashkëpunimit jo vetëm në aspektin e administrimit zgjedhor dhe mbrojtjes së votës, por edhe gjithëpërfshirjes në lista të emrave që do të propozohen nga partitë aleate, bazuar në peshën elektorale.
Mësohet se me përmbylljen e marrëveshjeve me partitë aleate, një tjetër marrëveshje paszgjedhore do të nënshkruhet mes dy koalicioneve që do të përfaqësojnë opozitën e bashkuar, ku në përputhje me peshën elektorale, do të përcaktohen edhe modalitetet e bashkëqeverisjes.
Ndërkohë nga burime brenda PD pohohet se është drejt përfundimit lista e plotë me drejtuesit e qarqeve. Deri më tani janë përmmbyllur drejtuesit e qarqeve në Shkodër, Fier dhe Vlorë ku do të drejtojnë fushatën e PD përkatësisht Helidon Bushati, Enkelejd Alibeaj dhe Bujar Leskaj.
Po kështu raportohet se ish-kryebashkiaku i Kamzës, Xhelal Mziu, do të jetë pjesë e listës së kandidatëve në Qarkun Dibër, ndërsa Flamur Hoxha do të jetë në zonën e Kamzës. /BN/
