Shtetet e Bashkuara kane nisur Partneritetin e Ndërlidhjeve Digjitale dhe Sigurisë Kibernetike për të katalizuar investimet e sektorit privat në infrastrukturën e sigurt të teknologjisë së informacionit dhe komunikimit dhe për të promovuar një ekonomi digjitale transparente, ndërvepruese, të besueshme dhe të sigurt, njoftoi sot Ambasada amerikane në Tiranë.
“Nisur nga Sekretari i Shtetit i SHBA Michael R. Pompeo, nën këtë nismë qeveria amerikane ofron trajnim dhe mbështetje teknike këshilluese për të ndihmuar shtetet të vendosin në mënyrë të sigurt teknologjinë 5G, duke përfituar gjithashtu nga mundësitë e jashtëzakonshme ekonomike të mundësuara nga përmirësimi i lidhjeve.”
Teknologjia wireless e gjeneratës së pestë është transformuese dhe ka potencialin për të riformuar industritë. Nga kujdesi shëndetësor në distancë deri tek makinat që drejtojnë vetveten, te shërbimet jetike si rrjetet elektrike dhe sistemet e ujit, 5G ka potencialin të prekë çdo pjesë të jetës sonë.
Ne duhet të jemi në gjendje të besojmë se pajisjet dhe softuerët 5G nuk do të kërcënojnë sigurinë kombëtare, privatësinë ose të drejtat e njeriut të qytetarëve dhe mbajtësve të të drejtave të pronës intelektuale. Kjo është arsyeja pse Shtetet e Bashkuara kanë një politikë të qartë për sigurinë 5G dhe po punojnë me vendet për të zhvilluar dhe ndërtuar infrastrukturë të sigurt 5G.
Duke ofruar mjete financimi dhe ekspertizë teknike, Shtetet e Bashkuara do t’u mundësojnë vendeve që të ndërtojnë infrastrukturën e tyre 5G pa u mbështetur në firmat e pabesueshme kineze të telekomunikacionit ose në kreditë e errëta dhe problematike kineze.
