Ish komandatët e UÇK po qëndrojnë të arrestuar ndërsa vijon hetimi nga Gjykata Speciale e Hagës pasi akuzohen për krime lufte, ndërsa kanë kërkuar mbështetje financiare nga shteti i Kosovës për të paguar avokatët. Ministri në detyrë i Drejtësisë Selim Selimi, ka bërë të ditur se tashmë kanë pranuar disa kërkesa për mbështetje financiare nga të akuzuarit.
Selimi nuk ka dhënë detaje se kush e ka bërë kërkesën, por u shpreh se komisioni në kuadër të ministrisë ka filluar punën dhe të gjithë presin që gjatë kësaj jave të adresohen të gjitha kërkesat.
“Unë kisha qenë i rezervuar që të jap detaje të mëtutjeshme, pasi që këto kërkesa janë bërë nga mbrojtja dhe çdo shpërfaqje e ndonjë detaji mund ta dëmtojë mbrojtjen e secilit të akuzuar. Unë mund të konfirmoj se kemi pranuar disa kërkesa nga të akuzuarit potencialë, komisioni ka filluar punën në shqyrtimin e këtyre kërkesave dhe shpresoj që gjatë kësaj jave të gjitha këto kërkesa që i kemi ne të adresohen. Rrjedhimisht pas adresimit të këtyre kërkesave ne bashkë me Ministrinë e Financave dhe Thesarin do të bëjmë diskursin e atyre mjeteve të kërkuara”, tha ai.
Selimi ka premtuar se i gjithë procesi i ndihmës do të jetë transparent, derisa bëri të ditur se deri në fund të këtij viti nuk janë shpenzuar paratë, por vetëm janë zotuar ato.
“Nga këto udhëzime administrative ne kemi formuar komisionin, komisioni derisa ka filluar punën ka marrë pak kohë për shkak që është dashur verifikimi nga AKI, fatmirësisht verifikimi ka ardhur rishtazi dhe komisioni ka filluar punën edhe zyrtarisht. Janë shqyrtuar kërkesat, të cilat kanë ardhur nga të akuzuarit potencialë. Deri në fund të këtij viti nuk janë shpenzuar paratë, por ato janë zotuar, pasi që komisioni sapo ka marrë disa vendime. Në momentin kur fillon shpenzimi i parave, ne do t’ju informojmë për harxhimet financiare. Vendimin të cilin ju e përmendët, është i saktë se i klasifikon si sekrete, por ne jemi të obliguar që taksapaguesve tanë t’iu tregojmë për shumën totale të cilën ministria e jep në këto raste. Andaj në momentin kur fillon diskursimi i mjeteve në bazë të kërkesave të avokatëve të palëve të akuzuara atje do të jeni të informuar”, shtoi ai.
Gjatë këtij viti Gjykata Speciale ka ngritur aktakuzë për krime lufte për Hashim Thaçin, Kadri Veselin, Jakup Krasniqin, Selim Selimin, Hysni Gucatin, Nasim Haradinajn dhe Salih Mustafën.
