Kreu demokrat, Lulzim Basha, gjatë një takimi me studentë të Universitetit Bujqësor, u shpreh se kupa është mbushur, është derdhur dhe nuk mund të vijohet më me këtë situatë.
Reagimi i Bashës ka ardhur pasi ka dëgjuar problemet me të cilat studentët përballen dhe mungesën e mbështetjes nga ana e Qeverisë.
Studentët e pranishëm janë shprehur se efektiviteti i mësimit online është zero, ndërsa ata e kanë të vështirë të punësohen pas diplomimit.
Basha tha se sfida jonë është të prezantojmë një rrugëdalje të qartë nga kriza. “Kështu s’mund të vazhdohet, koha për ndryshim. Profesionistë si ju mund të jepni kontribut në menaxhimin e mjedisit. Nuk ka turizëm me mjedis të shkatërruar”, tha kreu demokrat.
Sipas tij, Qeveria është kthyer në një pengesë kryesore për zhvillimin, ndërsa tha se detyra parësore mbetet ndalja e shpopullimit të vendit.
Kreu demokrat tha se ndryshimin mund ta sjellë vetëm bashkimi i vlerave, duke shtuar se ndryshim do të thotë që Qeveria të jetë urë ndërmjet shkollimit dhe punësimit, zhbllokim i mundësive për zhvillim dhe investime.
Basha tha se më 25 prill duhet të investohemi për të siguruar ndryshimin. Duke folur për turizmin, Basha tha se objektivi ynë është që Shqipëria të bëhet destinacion i turistëve të pasur.
Por sipas tij, që të realizohet kjo, duhet të ndryshohet qasja ndaj ndërtuesve, operatorëve dhe administratorëve të hoteleve, bujtinave dhe çdo gjëje që ka lidhje me turizmin. Basha tha se së pari nevojiten punonjësit e kualifikuar, por edhe infrastruktura turistike.
