Drejtori i Policisë së Shtetit, Ardi Veliu, ka folur sot mbi sukseset e institucionit që drejton, duke u shprehur se janë përballuar me sukses sfidat. Sipas kryepolicit, u përballua me sukses sezoni turistik, protestat por edhe pandemia.
Në fakt, për pandeminë vetëm Ardi Veliu, mund t’a kuptojë se çfarë suksesi është arritur nga policia, e cila për muaj me rradhë u drejtua nga rrjetet sociale të Kryeministrit Edi Rama dhe mori si mision të saj dhunimin e qytetarëve që kapeshin jashtë fashave policore. Ndoshta ky është një nga ato sukseset që ka pasur në mendje Veliu, pavarësisht se nuk e përmendi.
Po kështu një tjetër sukses i policisë, që u harrua nga Veliu, ishte gazi lotsjellës i hedhur pa kriter, jo vetëm në demostrata e protesta, por edhe për të nxjerrë nga banesat e tyre nënat dhe fëmijët, që më pas të ndërhynin fadromat dhe të shembnin ndërtesat. Ndoshta sukses është edhe dhuna ndaj banorëve të Unazës së Re që mbronin banesat e tyre, apo dhuna ndaj çdokujt që protestonte për të mbrojtur të drejtat.
Një sukses po kaq i madh i policisë, që nuk përmendet nga Kryepolici ishte shembja e Teatrit Kombëtar, ku forcat speciale mësynë të armatosur në godinë, ku kishte pjesëtarë të shoqërisë civile dhe artistë. Zelli në këtë rast ishte aq i madh, sa një aksion i tillë nuk është ndërmarrë nga policia, as kur ka shkuar të arrestojë persona me rrezikshmëri të lartë.
Dhuna ndaj të miturve dhe të rinjve, shoqërimi në komisariate, skenat kur njerëz me uniformë por pa numra, i godisnin apo i vendosnin shkelmin në grykë, janë të tjera suksese të policisë së drejtuar nga Veliu, që duket se harroi t’i përmendte sot kur prezantoi anketimin mbi perceptimin e publikut për Policinë e Shtetit.
Po kështu harroi edhe ngjarjen e fundit, atë të ndodhur mëngjesin e 8 dhjetorit, kur një 25-vjeçar u ekzekutua nga një punonjës policie dhe u tentua manipulimi i krimit. Ndoshta edhe këtë Ardi Veliu mund t’a përfshijë në listën e sukseseve policore, sikundër të gjitha ngjarjet që shoqëruan vitin 2019 apo 2020.
Ndaj përtej sukseseve që përmend në realizimin e detyrave nga policia, mund të përfshihen edhe këto që kanë sjellë edhe reagimet e ndërkombëtarëve, në Europë dhe më gjerë, dhe që kërkojnë hetim mbi rastet e dhunës policore.
