Një mesazh i fortë me standarde të larta demokracie dhe të shtetit të së drejtës, e ka konsideruar Petrit Vasili, vendimin e fundit të Gjykatës Kushtetuese të Kosovës, me shpalljen e pavlefshme të votës së deputetit Arifi, duke e çuar vendin drejt zgjedhjeve të parakohshme.
“Është një lajm impresionant dhe standard i lartë demokracie dhe shtetit të së drejtës. Një tjetër mesazh i fortë nga Kosova, një Gjykatë Kushtetuese që jep vendime ashtu si ligji kërkon, jo dëshirat e politikës”.
Sipas Vasilit, në vend që Shqipëria të ishte shembull pozitiv për Kosovën, përkundrazi merr mësime prej saj. Ai thotë se situata në Shqipëri është në kaos për shkak të mosfunksionimit të Gjykatës së Lartë dhe Kushtetuese, dhe përgjegjësia e rëndë mbi ata që e kanë penguar ngritjen e këtyre institucioneve.
“Është një mall që i djeg të gjithë shqiptarët që kanë vite pa Gjykatë Kushtetuese dhe po përjetojnë një situatë që nuk e kanë përjetuar dhe përgjegjësi e rëndë për ata që kanë sjellë këtë kaos. Është shumë e rëndë që janë vite të tëra pa Gjykatë Kushtetuese dhe Gjykatë të Lartë. Ne shohim me zili Kosovën si një vend që funksionon. Për këtë gjë përgjegjësi kanë të gjithë”.
Ai akuzon SPAK-un se nuk po arrin dot nivelin e efektivitetit të ish-Prokurorisë së Krimeve të Rënda dhe këtu i referohet dosjes 184, ku krimi zgjedhor është fakt, por nuk ka asnjë fajtor.
“SPAK ka vullnet të merret me të shkuarën, por gjëmimet tona nuk shkojnë në veshin e tij. Një nga shuplakat më të forta që ka marrë drejtësia e re. Ky SPAK nuk po arrin dot nivelin efektivitetit të ish-Prokurorisë së Krimeve të Rënda. Ky është fakt që duhet të vënë duart në kokë të gjithë edhe të huajt. Kemi dëgjuar blerjen e votave dhe paturpësisht krimi zgjedhor nuk pati kohë për të hetuar shitblerjen, që është fakt, por fajtor nuk ka. Shqiptarët kanë një tufë të paturpësh, të evidentuar për krimin zgjedhor, dhe nuk dënohen. Nëse stabiliteti vjen prej krimit zgjedhor e çon në greminë Shqipërinë”.
I pyetur nëse LSI-ja do të kandidojë së bashku me PD-në në zgjedhjet e 25 prillit, Vasili tha se ende nuk ka asnjë vendim, por shtoi se shqiptarët janë në kampin opozitar kundër Ramës.
“Nuk ka pasur asnjë vendim as nga PD e LSI. Do të ketë një vendimmarrje, por ka një vendim që nuk lëviz, që Rama është i vetëm dhe kampi opozitar ku janë vendosur shqiptarët janë në kampin tjetër. Çdo votë opozitare të akomodohet si duhet”.
Ai akuzoi mazhorancën se për herë të parë në Shqipëri ndryshoi rregullat e lojës në zgjedhje, në mënyrë të njëanshme për shkak të panikut të humbjes.
“Për herë të parë kemi një mazhorancë që ka vendosur në mënyrë të njëanshme rregullat e lojës. Standardi ka qenë konsensusi i plotë se në zgjedhje hyjmë si të barabartë. Këta kanë shkatërruar rregullat e lojës. Një mazhorancë në panik ndryshoi rregullat në mënyrë të njëanshme”.
