Ashtu siç ishte paralajmëruar ka nisur në orën 18:00 protesta e radhës, pas vrasjes së 25-vjeçarit Klodian Rasha nga një efektiv policie. Pak minuta para nisjes së tubimit para godinës së Qeverisë, makina e Kryeministrit u largua nga selia e qeverisë.
Ndryshe nga dy tubimet e tjera, mbrëmjen e sotme është caktuar që të mbahet përpara Kryeministrisë, pasi ministri i Brendshëm u dorëhoq.
Tashmë protestuesit, të organizuar në rrjetet sociale kërkojnë largimin e drejtorit të policisë së shtetit, Ardi Veliu. Kërkesës së grupit të qytetarëve, kreu i qeverisë iu përgjigj prerë; nuk do të realizohet kurrë. Tashmë mbetet për t’u parë se cfarë do të ndodhë në vijim, teksa masat e policisë janë të forta.
Në dy protestat e para, të mërkurën dhe të enjten nuk kanë munguar përplasjet mes policisë dhe protestuesve.
