Deputeti Mhill Fufi është përjashtuar nga grupi parlamentar i Partisë Demokratike. Ky është vendimi i marrë nga kryetari i demokratëve Lulzim Basha.
Shkak për përjashtimin e tij është fakti që Mhill Fufi qëndroi në Parlament gjatë votimit të ligjeve të mazhorancës, ndryshe nga deputetët e opozitës që u larguan nga salla.
Grupi parlamentar i demokratëve kishte marrë vendim që do të braktiste votimin e ligjeve të qeverisë sot në Parlament, si shenjë bojkoti për keqqeverisjen e vendit dhe situatën e kanabisit.
Edhe seancën e kaluar, deputetët e PD braktisën sallën gjatë votimit të ligjeve. Ndryshe nga hera e kaluar, në seancën e sotme deputeti Mhill Fufi qëndroi në Parlament dhe u pa duke biseduar me deputetin tjetër të qarkut të Lezhës, por të LSI-së, Gjovalin Kadeli. Por nuk dihet nëse Fufi i ka votuar ligjet.
