Dy shqiptarë janë plagosur pas një aksidenti me motor në afërsi të kufirit greko-shqiptar të Qafë Botës.
Ngjarja ka ndodhur pasditen e kësaj të diele në afërsi të fshatit Filati, në Greqi.
Një nga të plagosurit, një 43-vjeçare, është dërguar në gjendje të rëndë shëndetësore në një spital të Janinës.
Pas aksidentit, drejtuesi i motorit i cili mori plagë më të lehta, është shoqëruar në komisariat.
Nga drejtuesi i mjetit që shoqëronte me motor 43-vjeçaren me iniciale A.K., mësohet se gruaja kishte hyrë ilegalisht në shtetin fqinj.
Burime policore konfirmojnë se ajo synonte të shkonte për punë në Greqi, por ishte pa dokumente.
Ndërkohë nuk ka ende informacion se si ata e kanë kaluar kufirin greko-shqiptar. Dyshohet se gruaja e ka kaluar në këmbë kufirin tokësor, ndërsa ajo është pritur dhe është ndihmuar nga burri, i cili më pas është aksidentuar bashkë me të.
Policia po heton ngjarjen e rëndë.
